Schwabstedt – Dat is een ganse Enn hoch bit na den Glockenstapel in Schwabstedt: Op een schmale Padd krüppst dor hoch, een paar Stiegen ut Holt sind dor inslahn, un an een Stück Tau kanns di fastholen. Un an’t Enn büst du doar, wo de Musik speelt…..
Vun Kotzbeckens un anner Malheurs
Um de twinni Lüüd sünd in den holten Torn tosamkam. Still is dat, gans still. Denn hüüt lest Heidi Bartelt vör. Un Heidi is een echte Plattdütsche, dat kanns hörn. Un de annern, dat sünd uk Plattdütschen. Wenn Heidi sik verpust oder umblädern deiht, denn fangen se an to vertellen. „Jo, so wat as een ‚Kotzbecken‘ harn wi fröher uk in de Krooch! Dat weer man een Stack, over wenn een wat loswarrn muss, denn gung he dorhen un hung sik doröver.“ Ob de Geschicht mit dat Gebiss, dat dorbi mit utfloch, nu woar is oder nich – so genau will dat an düssen Obend keener weeten.
Plattdüütsch vun hüüt
Heidi Bartelt läst Geschichten vun hüüt. Vun Minschen, de in disse Tied leben un plattdütsch schnacken. Un de beleben so allerhand Malheurs jüss so as Hochdütschen. Een sitt in’t Hotel und denkt sik allerhand „Allergien“ ut, um eern Willn to kriegen. Een anner geiht to een „Candle-Light-Dinner“ mit dat Hardsleev, over all Näslang klingelt dat Handy: de Kinner, alleen bit Huus, strieden sik üm den Fernseher.
Vörlesen in’n Glockentorn
„Vörlesen in’n Glockentorn“ heet de Reech – de Karkengemeende makt dat nu all süüt wegge Johrn. Un jeden Obend läst eener anners vör. Morgen an’n 21. August läst Ralf Krüger wat vun Siegfried Lenz, denn geiht dat weer hochdüütsch to in’n Torn. An’n Mittwoch hem Elke Tychsen und Gudrun Oschmann dat övernahm, denn gifft dat Poetry-Slam. Un an Dunnerstach kummt „Paster Michael“. „Dat war een Överraschung“ secht Heidi Bartelt.
„Hyggeli“ wüer de Däne seggn
Een Stunn duert de Spaß, dorto gifft dat een Glas Water oder wer mach, kricht uk roden Wien. Gemütli is dat, un irgendwie doch meis as fröher op de Klütenkist. „De Lüüd töven dor richti op“, vertellt Heidi Bartelt: Vörlesen in’n Glockentorn gifft dat blots eenmal in’t Johr, wenn de Summer to Enn geiht. „Ik freu mi, dat dor Leben in unse schöne Glockentorn is.“